Ilul Umawas gh usgwas n 1978 gh Dcayra, tasga n iffus n Ugadir, tamdint n umarg amazigh. Ghin agh ighra ghin a gh issnti tabrida ns gh umarg.
Gh mzzi ns sul, Amawas ittut s ughdjaj n umarg, inkêd gh wallagh n uzawan, amzzugh ns issfld i i ur d imik gh taddângiwin n rrways, ghik lli d yugm gh tarmiwin n imarirn itrarn (taznzart, Àmmuri d wiyyâd).
Isnti tarmi ns gh 2000. Gh umzwaru, yiws gh immussutn idlsann, iwizn n uzawan n tmsmunin gh tsga n Ugadir, Amawas ghilad iskr amras ns ngr ayt umarg gh kraygat mani gh Mrruk.
Tasmghurt n usnflul gh unmuggar n Tmitar gh 2005 lli yiwi, tul as bahra atig gh dar imarayn ns, aylli isgrn gh 2006 ad idî tasffift d CD ns Taghufi gh yan usqqul amadêlan.
